एजेन्सी– पेरिस सेन्ट जर्मेन (पीएसजी) ले फ्रान्सेली लिग वानमा सहज जित निकालेको छ ।

आईतबार राति भएको खेलमा स्टार खेलाडीबिनानै मैदान उत्रिएको पीएसजीले टुलुजलाई ४–० गोल अन्तरले पराजित गरेको हो ।

घरेलु मैदानमा पीएसजीलाई जित दिलाउन चौपो मोटिङले दुई गोल गरे । मार्किन्होसले एक गोल गरे । पीएजीका लागि खेलको ५० औँ मिनेटमा मोटिङले गोल गर्दै घरेलु टोलीलाई सुरुवाती अग्रता दिलाएका थिए ।

खेलको ५५ औँ मिनेटमा गोन्साल्वेसको आत्मघाति गोलबाट पीएसजीले २–० गोलको अग्रता बनाएको थियो । त्यस्तै खेलको ७५ औँ मिनेटमा मोटिङले व्यक्तिगत दोस्रो गोल गर्दै घरेलु टोलीको अग्रता ३–० बनाए । निकैनै रोमाञ्चक खेलमा मार्किन्होसले ८३ औँ मिनेटमा गोल गर्दै घरेलु टोलीलाई ४–० को फराकिलो जित दिलाए ।

जितसँगै पीएसजी तीन खेलबाट ६ अंक जोडेको छ । पीएसजी तालिकाको तेस्रो स्थानमा छ । टुलुज तीन खेलबाट ४ अंकसहित तालिकाको १२ औ स्थानमा छ ।