कैलाली– सर्वसाधारणलाई चिसोबाट जोगाउन कैलाली जिल्लाका विभिन्न स्थानमा दाउरा वितरण गर्न थालिएको छ ।

शीतलहरसँगै बढ्दै गएको चिसोले जनजीवनमा समस्या भएपछि वन डिभिजन कार्यालय र स्थानीय सामुदायिक वन समितिसँग समन्वय गरी जिल्ला प्रहरी कार्यालय र सशस्त्र प्रहरी बलले छुट्टाछुट्टै दाउरा वितरण गर्न थालेका हुन् ।

जिल्ला प्रहरी कार्यालयका प्रवक्ता दक्षकुमार बस्नेतले जिल्लाको धनगढी, गोदावरी, गौरीगङ्गा, घोडाघोडी, बर्दगोरिया, लम्कीचुहा र टीकापुर नगर क्षेत्रका विभिन्न स्थानमा दाउरा वितरण गरिएको जानकारी दिए ।

यसैगरी सशस्त्र प्रहरी बल , नम्बर ३४ गण मुख्यालय कैलालीको पहलमा डोकेबजार, पहलमानपुर, धनगढी, गोदावरी, लम्कीचुहा, जोशीपुर, भजनी टीकापुरलगायतका क्षेत्रमा दाउरा वितरण गरिएको छ । कैलाली कञ्चनपुरलगायतका जिल्लामा भइरहेको शीतलहरसँगै बढेको चिसोले जनजीवन कष्टकर बनेको छ । जाडोले वृद्धवृद्धा, बालबालिका र मजदूर वर्गलाई बढी असर पुर्‍याएको छ ।

शीतलहरका कारण आलु र गोलभेँडालगायतको बालीमा डढुवा रोगको सङ्क्रमण भई बाली नष्ट हुन थालेको स्थानीय किसान नारायण चौधरीले बताए ।