काठमाडौं– पोखरा प्रिमियर लिग (पीपीएल) को फाइनलमा विराटनगर टाइटन्स र चितवन राइनोजले प्रतिस्पर्धा गर्ने भएका छन् ।

पोखरा क्रिकेट मैदानमा भएको इलिमिनेटरमा बुटबल बलनास्टर्सलाई २१ रनले पराजित गर्दै विराटनगरले चितवनसँग फाइनल भेट पक्का गरेको हो ।

टस हारेर पहिलो ब्याटिङ गरेको विराटनगरले दिएको १ सय ६६ रनको लक्ष्य पछ्याएको बुटबलले २० ओभर पूरा खेल्दै १० विकेट गुमाएर १सय४४ रन मात्रै बनाउन सक्यो ।

बुटवलले १सय४४ रन बनाउँदा भीम सार्कीले ४४ तथा अफ्ताबूदिन अहमेदले ४३ रन बनाए । यस्तै पुरन बिकेले १५ तथा शिवम सिंहले १४ रन जोडे।

बुटबलविरुद्ध विराटनगरका शाहब आलम र पुनित मेहेराले समान ३–३ विकेट लिए । यस अघि टस हारेर पहिले ब्याटिङ गरेको विराटनगरले २० ओभरमा ५ विकेट गुमाएर १ सय ६५ रन बनाएको थियो ।

विराटनगरका सुनिल धमलाले अर्धशतकीय इनिङ्स खेले । ५४ बलको सामना गरेका उनले २ छक्का र ४ चौकाको मद्दतमा ६१ रन बनाएका थिए ।

यस्तै कप्तान प्रदिप ऐरीले अविजित ३३ रन बनाउँदा जैद आलमले २०, लोकेश बम र पुनित महराले समान १९ रन बनाएका थिए ।

बुटवलका हर्ष टंकले २ विकेट लिए । यस्तै ललित भण्डारी र अविनास बोहराले समान १–१ विकेट लिए ।

लिगमा बुटवल दोस्रो स्थानमा रहदै प्ले इलिमिनेटरमा पुगेको थियो । लिगको शीर्ष स्थानमा रहेको चितवन राइनोज यसअघि नै फाइनलमा पुगिसकेको छ । अब शनिबार चितवन र विराटनगर पीपीएलको उपाधिका लागि भिड्नेछन् ।