विराटनगर– कांग्रेसका सभापति शेरबहादुर देउवाले सरकारले ल्याउन लागेको संवैधानिक परिषदसम्बन्धी अध्यादेश कांग्रेसलाई मान्य नहुने बताएका छन् ।

विराटनगरमा मंगलबार पत्रकारसँग कुराकानी गर्दै सभापति देउवाले सरकारले संवैधानिक परिषदलाई शाही आयोग जस्तो बनाउने खोजेको आरोप लगाउँदै अध्यादेश कांग्रेसलाई मान्य नहुने बताएका हुन् ।

उनले भने, ‘२०४८ सालदेखि चलिआएको संवैधानिक परिषदसम्बन्धी ऐन अहिले किन बदल्नु पर्‍यो त्यो हामीलाई मान्य हुँदैन ।’

परिषद्को बहुमतबाट संवैधानिक आयोगका पदाधिकारी नियुक्ति गर्न सकिने गरी अध्यादेश ल्याउने मन्त्रिपरिषद्ले निर्णय गरेको छ। मन्त्रिपरिषद्ले पारित गरी पठाएको अध्यादेश राष्ट्रपति कार्यालयमा विचाराधीन छ ।

फरक प्रसंगमा उनले भारतले नेपाली भू–भाग समेटर नक्सा जारी गरेको सन्दर्भमा प्रधानमन्त्री केपी ओलीको पनि भूमिका समेत रहेको आशय प्रकट गरेका थिए ।

‘वालुवाटारमा भएको छलफलमा भारतले नेपाल र पाकिस्तानलाई बराबरै हेरेकाले सरकारलाई तत्काल नक्सा सच्याउन अघि बढ्न र आफूहरु साथमा भएको भनेका थियौं,’ उनले भने, ‘तर अहिलेसम्म सरकार खोई अगाडि बढ्न सक्यो ?’