काठमाडौं– पछिल्ला केही दिन यता सामाजिक सञ्जालहरुमा प्लास्टिकका चामल र अण्डा बजारमा फेला परेको विषय चर्चामा छ ।

देशका विभिन्न स्थानमा प्लास्टिकबाट बनेको चामल, अण्डा र पिठो फेला परेको समाचारहरु बाहिरिएका मात्र छैनन् प्रहरीमा यस्ता घटनाका बारेमा उजुरीसमेत परेका छन् ।

प्लास्टिकका चामल फेला परेको भन्दै देशभर २० भन्दा धेरैले प्रहरीमा उजुरीसमेत गरेका छन् । तर प्रहरीले गरेको अनुसन्धान र खाद्य प्रविधि तथा गुण नियन्त्रणको प्रयोगशाला परीक्षणमा समेत प्लास्टिकका चामल र अण्डाबारे पुष्टि हुन सकेको छैन ।

के साच्चै प्लास्टिकको चामल हुन्छ ?

प्लास्टिकको चामल र अण्डा बजारमा पाइने समाचारहरु बेलाबेलामा सार्वजनिक हुने गरेको छ । विशेषगरि भारतीय सञ्चारमाध्यममा यस्ता समाचारहरु प्रकाशन र प्रसारण हुने गरेका छन् ।

प्लास्टिकबाट बनेको चामल चीनमा उत्पादन हुने बारेको समाचार केही दिन अघि भारतीय अनलाइनमा पोस्ट भएका थिए । त्यसलाई केही नेपाली अनलाइन र सामाजिक सञ्जाल प्रयोगकर्ताले सेयरसमेत गरेको थिए । त्यसकै कारण पनि प्लास्टिकको चामल बारेका सामाग्रीहरु सामाजिक सञ्जालमा देखा परेका थिए ।

नेपालमा पनि होला ?

सरकारको कृषि तथा पशुपन्छी विकास मन्त्रालय अन्तर्गतको खाद्य प्रविधि तथा गुण नियन्त्रण विभागले प्लास्टिकको चामल र अण्डा नहुने बताएको छ ।

पछिल्लो समयमा सामाजिक सञ्जाल तथा विभिन्न सञ्चार माध्यमहरुमा प्लास्टिकको चामल र अन्डा बजारमा रहेको भन्ने समाचारहरु सार्वजनिक भइरहेको र त्यो भ्रमपूर्ण रहेको खाद्य प्रविधि तथा गुण नियन्त्रण विभागले जनाएको छ ।

विभागका अनुसार यस्ता खाद्य पदार्थहरु खाद्य प्रविधिले गरेको प्रयोगशाला विश्लेषण तथा अन्तर्राष्ट्रिय खाद्य नियामक प्रयोगशालाहरुले गरेको परीक्षणमा समेतमा नपाइएको जनाएको छ ।

त्यसैले यस्ता निराधार हल्लाको पछि नलाग्न सूचना जारी गरेर खाद्य प्रविधि तथा गुण नियन्त्रण विभाग अनुरोध गरेको छ ।