एजेन्सी– अफगानिस्तानका लागि अमेरिकी विशेष प्रतिनिधि तथा अफगानिस्तानमा सक्रिय लडाकु समुह तालिबानको राजनीतिक समूहका प्रतिनिधिबीच कतारको राजधानी दोहामा अर्को चरणको शान्ति वार्ता शुरु भएको छ ।

शान्ति वार्ताका लागि अफगानिस्तानमा सक्रिय इस्लामिक लडाकु समूह तालिबानका सहसंस्थापक कतारको राजधानी दोहा पुगेका हुन् । विगत १७ वर्षदेखि अफगानिस्तानमा जारी द्वन्द्व अन्त्यका लागि अमेरिकी विशेष प्रतिनिधि जाल्माए खालिदजाद र तालिबानका राजनीतिक समूहबीच जारी वार्तामा सहभागी हुन तालिबानका सहसंस्थापक मध्येका एकजना मुल्लाह अब्दुल घानी बरदार कतारको राजधानी दोहा पुगेका हुन् । मुल्लाह बरदार एक वर्षअघि पाकिस्तानको जेलमा बन्दी थिए ।

शान्ति वार्ताका क्रममा विगत १७ वर्षयता जारी द्वन्द्व अन्त्य गर्ने विषयमा छलफल हुने बताइएको छ । यसअघि भएका वार्तामा तालिबान र अमेरिकाबीच अफगानिस्तानमा हिंसा अन्त्यका विषयमा निकै महत्वपूर्ण उपलब्धि हाँसिल भएको समाचार सार्वजनिक भएको थियो ।
शान्ति वार्ताका क्रममा अमेरिकाले अफगानिस्तानबाट आफ्ना सेना फिर्ता लैजाने तथा तालिबानले मुलुकमा अन्य आतंकवादी समूहलाई गतिविधि गर्न नदिने खाकामा सम्झौता हुनसक्ने बताइएको छ ।

तालिबान र अमेरिकाबीचको अफगानिस्तानमा हिंसा अन्त्यका लागि ठूलो चुनौती अझै बाँकी नै रहेपनि यो शान्ति वार्ता अफगानिस्तानमा जारी द्वन्द्व अन्त्य गर्ने दिशामा महत्वपूर्ण भूमिका खेल्ने अमेरिकी तथा तालिबानका प्रतिनिधिले जनाएका छन् ।

यता अफगान सरकारलाई यो शान्ति वार्ता प्रकृयामा सहभागी नगराइएपछि अफगान राष्ट्रपति अशरफ घानी भने असन्तुष्ट रहेको बताइएको छ । तालिबानले भने अफगान सरकार अमेरिकाको कठपुतली भएकाले कठपुतलीसँग वार्ता हुनै नसक्ने अडान लिँदै आएको छ ।