कलैया– नेपाल कम्युनिष्ट पार्टी (नेकपा) प्रदेश नम्बर २ का अध्यक्ष प्रभु साहले गाउँ गाउँमा सिहंदरबार मात्र नभइ नारायणहिटी पनि सँगसँगै आएको बताएका छन् ।

बिहीवार बाराको आदर्शकोतवाल गाउँपालिकामा आयोजित बारा जिल्ला कमिटी सदस्य शम्भु मण्डलको श्रद्धाञ्जलीसभामा अध्यक्ष साहले सामन्तवादको अवशेष बाँकी रहनु परिवर्तन संस्थागत हुन नदिने ठूलो कारक रहेको बताए ।

अध्यक्ष साहले भने, “हामी जनतालाई अझै बलियो बनाउन चाहन्छौँ । गाउँमा सिंहदरबार ल्याउन चाहेका थियौँ तर काहीँ काहीँ नारायणहिटी दरबार आइपुगेको छ । जुन चिन्ताको विषय हो । राजा त हटाएका छौँ तर कुनै कुनै ठाउँमा त्यसको अवशेष बाँकी छ । जनप्रतिनिधिहरु राजाझैँ प्रस्तुत हुन थालेका छन् जुन परिवर्तन संस्थागत गर्न सबैभन्दा ठूलो चुनौति हो ।“

कम्युनिष्ट आन्दोलनमा शम्भु मण्डलको ऐतिहासिक भुमिका रहेको भन्दै अध्यक्ष साहले भने, “ शम्भु मण्डलको निधनले पार्टी र समाजलाई क्षति भएको छ । उहाँहरु जस्ता वीर वामपन्थीहरुको योगदानबाट सामन्तवादविरुद्धको लडाई सफल भएको छ । तर पनि केही सामन्तवादी संस्कृति र संस्कारको अवशेष अझै पनि समाजमा बाँकी छ । ती अवशेषको बलमा नयाँ नयाँ राजा जन्मिने संभावना रहेको छ । सामन्तवादविरुद्धको लडाईलाई उत्कर्षमा पुर्याउन तथा जुन शम्भु मण्डलजस्ता वीर कम्युनिष्ट योद्धाहरुको सपना पुरा गर्न त्यसमाथि नजर राख्नुपर्छ र ती अवशेषहरु मेटाउनुपर्छ ।“

अध्यक्ष साहले प्रदेश नम्बर २ सरकार संघीयताका लागि सबैभन्दा ठूलो खतरा रहेको आरोप लगाए । अध्यक्ष साहले भने, “ प्रदेश नम्बर २ पुरै भ्रष्टाचारमा लिप्त छ । जुन संघीयताका लागि सबैभन्दा घातक हो ।“ उनले थपे, “प्रदेश सरकार नै भ्रष्टाचार गर्न थालेपछि संघीयता कसरी सफल हुन्छ ? संघीयतालाई असफल पार्ने र जनतालाई निराश पार्ने काम प्रदेश नम्बर २ सरकारले गरिरहेको छ । जनताले तिरेको करलाई पार्टी र नेताको पैसा बनाउने काम प्रदेश सरकारले गरिरहेको छ ।“

“राज्यको पैसा मुख्यमन्त्री, मन्त्री, मेयर तथा नेताको खातामा पुर्याउने काम गरी प्रदेश सरकार संघीयता असफल पार्ने कार्यमा लागेको छ । प्रदेश सरकारले जनविरोधी काम गर्ने, जनताको पैसामाथि भ्रष्टाचार गर्ने, व्यक्तिगत स्वार्थ पुरा गर्ने जुन दिशामा लागेको त्यसको कारण संघीयताका लागि खतराको विषय हो “ उनले भने ।