तेहरान– अमेरिकाले इरानलाई वार्ताको प्रस्ताव गरेको दाबी पछिल्लो अमेरिकी नाकाबन्दीले असत्य साबित गरिदिएको इरानी राष्ट्रपति हसन रौहानीले जनाएका छन् ।

टेलिभिजनमार्फत् प्रत्यक्ष प्रसारण गरिएको सम्बोनमा राष्ट्रपति रौहानीले सर्वोच्च नेता आयातोल्लाह अली खमेनीमाथि अमेरिकाले हालै लगाएको नाकाबन्दीबाट वार्ताको ढोका खुल्ला रहेको अमेरिकी दाबी असत्य साबित भएको जनाएका हुन् ।

यसअघि अमेरिकी सुरक्षा सल्लाहाकार जोन बोल्टनले अमेरिका इरानसँग वार्ताका लागि ढोका खुल्ला राखेको जनाएका थिए । बोल्टनले अमेरिकी आग्रहलाई इरानले नसुनेको दावी पनि गरेका थिए । बोल्टनको उक्त भनाइप्रति लक्षित गर्दै रौहानीको यो प्रतिक्रिया आएको हो ।

अमेरिकाले सोमबारदेखि लगू हुनेगरी इरानमाथि थप प्रतिबन्ध लगाएको छ । इरानमाथि हतियार निर्माण र भण्डारण गर्न नदिन प्रतिबन्ध लगाइनुपर्ने र दवाव सिर्जना गर्नुपर्ने अमेरिकी भनाइ छ ।