काठमाडौं- नेत्रविक्रम चन्द (विप्लव) नेतृत्वको नेपाल कम्युनिष्ट पार्टीले आह्वान गरेको नेपाल बन्दको प्रभाव मुलुकका ३४ जिल्लामा परेको प्रहरीले जनाएको छ । प्रहरीको तथ्याङ्क अनुसार विभिन्न ३४ जिल्लामा साना–ठूला गरी ५५ वटा घटना भएका छन् ।

प्रहरीले मुलुकका विभिन्न स्थानमा २३ शंकास्पद वस्तु फेला पारेको जनाएको छ । त्यस्तै, मुलुकका विभिन्न ५ स्थानमा आगजनी भएको र ५ स्थानमा प्रेसर कुकर बम फेला परेको प्रहरीले जानकारी दिएको छ ।

त्यस्तै, ९ स्थानमा होक्स बम, ४ स्थानमा सुतली बम, ३ स्थानमा सिलिण्डर ग्यास बम, २ स्थानमा सकेट बमका साथै एक–एक स्थानमा टाइम बम, पेट्रोल बम र आरसी आईईडी बम फेला पारिएको प्रहरीले जनाएको छ ।

प्रहरीकाअनुसार एक स्थानमा तोडफोडको घटना भएको छ । त्यस्तै, प्रहरीले मुलुकका विभिन्न स्थानबाट ६ जनालाई पक्राउ गरिएको जानकारी दिएको छ ।