काठमाडौं- नेत्रविक्रम चन्द (विप्लव) नेतृत्वको नेकपाले नेपाल बन्द सफल बनाउन काठमाडौंमा तीन, ललितपुर र भक्तपुरमा एक-एक गरी पाँच स्थानमा विष्फोट गराउने योजना बनाएको प्रहरी स्रोतको दाबी छ ।

सोमबार साँझ काठमाडौंमा पक्राउ परेका विप्लवका एक कार्यकर्ताले दिएको बयानमा बन्द सफल बनाउन विष्फोट गराउने योजना रहेको बताएको प्रहरीले जनाएको हो ।

उनलाई महानगरीय प्रहरी परिसर काठमाडौंको टोलीले पक्राउ गरेको हो । प्रहरी स्रोतका अनुसार, विप्लव समूहले काठमाडौंको सोह्रखुट्टेलगायतका तीन स्थानमा विस्फोट गराउने योजना बनाएको थियो ।

त्यस्तै विप्लव समूहले भक्तपुर र ललितपुरमा एक-एक गरी दुईवटा बम विस्फोट गराउने योजना बनाएको थियो । तर, प्रहरीको गुप्तचर निकायको सर्तकता तथा सक्रियताका कारण उक्त योजना विफल भएको छ ।