काठमाडौं- नेत्र विक्रम चन्द विप्लवसमूहले बन्द आह्वान गरेकै दिन आज (मंगलबार) विभिन्न स्थानमा बम तथा शंकास्पद बस्तु फेला परेको छ । शंकास्पद बस्तु बम हुन सक्ने भन्दै स्थानीयबासी त्रसित भएका छन् ।

आज बिहान झापाको कन्काई पुलमा बम फेला परेको छ । बमलाई नेपाली सेनाको टोलीले डिस्पोज गरेको छ ।

यसैबीच प्यूठान नगरपालिका-४ जुम्री बसपार्कमा शंकास्पद वस्तु फेला परेको छ । होटल डाइमन्ड अगाडि ग्रिनेड आकारको वस्तु फेला परेका प्रहरीले जनाएको छ । शंकास्पद वस्तुलाई पत्रिकाले बेरिएको छ । जिल्ला प्रहरी कार्यालय प्युठानका प्रमुख प्रहरी नायव उपरीक्षक निर्मल बुढाथोकीका अनुसार शंकास्पद वस्तुमा घडी पनि राखिएको छ । शंकास्पद बस्तुलाई डिस्पोज गर्ने तयारी गरेको बुढाथोकीले बताए ।

नेकपा विप्लवले आह्वान गरेको नेपाल बन्दको कारण प्यूठान जिल्ला पूर्ण रूपमा प्रभावित भएको छ । बजार, शिक्षण संस्था, कलकारखाना सबै बन्द रहेका छन् ।