अमेरिका– इरानसँग मध्यपूर्वमा जारी तनावलाई मध्यनजर गर्दै अमेरिकी राष्ट्रपति ट्रम्पले ‘संकटकाल’ को घोषणा गर्दै साउदी अरब तथा त्यस क्षेत्रमा रहेका साउदी साझेदार मुलुकलाई ८ अर्ब डलर बराबरको हतियार बेच्ने घोषणा गरेका छन् ।

उनले साउदी अरबलाई हतियार बेच्न कंग्रेसको स्वीकृति नलिने अन्तर्राष्ट्रिय सञ्चारमाध्यमले जनाएका छन् ।

साउदी अरबले यमनमा अमेरिकी हतियारबाट ठूलो मात्रामा विध्वंश मच्चाएको भन्दै साउदी अरब लगायतका मुलुकलाई हतियार बच्न नहुने आवाज उठिरहेका बेला ट्रम्पको यस्तो कदम आएको हो ।

हतियार बेच्न कंग्रेसको स्वीकृति नलिने विषयमा ट्रम्प प्रशासनले कंग्रेसका समितिहरुलाई पत्राचार गरिसकेको बताइएको छ ।

इरानसँग मध्यपूर्वमा तनाव चुलिरहेका बेला अमेरिकी राष्ट्रपति ट्रम्पले साउदी अरब सहित संयुक्त अरब इमिरेट्स र जोर्डनलाई ८ अर्ब डलर बराबरका २२ किसिमका हतियार बेच्न लागेका हुन् ।

ट्रम्पको कदमको डेमोक्र्याटिक पार्टीका नेतासहित ट्रम्पको आफ्नै रिपब्लिकन नेताहरुले समेत आलोचना र विरोध जनाएका छन् ।