काठमाडौं–पूर्व प्रधानन्यायधीश नयनबहादुर खत्रीको अन्त्येष्टि गरिएको छ । ९६ वर्षको उमेरमा बिहिबार राति खत्रीको निधन भएको थियो ।

सर्वोच्च अदालतका न्यायाधीशहरुको पशुपति आर्यघाटमा बसेको पुर्ण बैठकले पूर्व प्रधानन्यायाधीश खत्रीको निधनको शोक प्रस्ताव पारित गर्दै भोलि देशभरका सबै अदालत बन्द गर्ने निर्णय समेत गरेको छ । निर्णय अनुसार भोलि नेपाल भरका जिल्ला अदालत, उच्च अदालत, सर्वोच्च अदालत, विशेष अदालतहरु बन्द हुनेछन् ।

विक्रम सम्वत् १९८० साल असोज ३ गते ललितपूर जिल्लामा जन्मिएका खत्री २०३१ सालमा प्रेस काउन्सिलको अध्यक्ष समेत बनेका थिए । २०३३ सालमा सर्वोच्चको प्रधानन्यायाधीश बनेका खत्री २०४२ सालसम्म प्रधानन्यायाधीश रहेका थिए ।

मानवअधिकार आयोगका पहिलो अध्यक्ष समेत बनेका खत्री कानून आयोगका समेत अध्यक्ष बनेका थिए । उनी चीनका लागि नेपाली राजदूतको रुपमा पनि काम गरेका थिए ।