काठमाडौं– यातायात व्यवस्था कार्यालय महेन्द्रनगरका कर्मचारीले ५ देखि १५ हजार रुपैयाँसम्म पैसा लिएर सवारी चालक अनुमतिपत्र (लाइसेन्स) बिक्री गर्ने गरेका खुलासा भएको छ ।

अख्तियार दुरुपयोग अनुसन्धान आयोगले गरेको छानबिनबाट यस्तो खुलासा भएको हो ।

यातायात व्यवस्था कार्यालय महेन्द्रनगरले २०७२ को असारमा सञ्चालन गरेको लाइसेन्सको लिखित परीक्षामा ३ हजार २ सय ११ जना सहभागी थिए । तर, १६ असार २०७२ देखि २६ असारसम्म सञ्चालन गरेको प्रयोगात्मक परीक्षा (ट्रायल) भने लिखित परीक्षा सहभागी नै नभएका ५४ जना सहभागी भएका कार्यालयको दस्तावेजमा उल्लेख छ ।

लिखित परीक्षामा सहभागी नै नभएका व्यक्तिलाई प्रयोगात्मक परीक्षामा सहभागी भइ पास भएको भनेर लाइसेन्स वितरण गरिएको अख्तियारको छानबिनबाट फेला परेको छ ।

अख्तियारका अनुसार यातायात व्यवस्था कार्यालय महेन्द्रनगरका तत्कालीन निमित्त कार्यालय प्रमुख एवम् परीक्षा समितिका अध्यक्ष सिताराम खनाको मिलेमतोमा अनियमितता भएको हो ।

अनियमिततामा यातायात व्यवस्था कार्यालयका मेकानिकल इन्जिनियर योगेन्द्रप्रसाद गुप्ता, जिल्ला ट्राफिक प्रहरी कार्यालय कञ्चनपुरका तत्कालीन प्रहरी निरीक्षक बाबुकाजी गिरीको पनि संलग्नता रहेको अख्तियारले जनाएको छ ।

अख्तियारका अनुसार यातायात व्यवस्था कार्यालयका प्रमुख खनाल, मेकानिकल इन्जिनियर गुप्ता र ट्राफिक प्रहरी निरीक्षक गिरीको मिलेमतोमा लिखित र प्रयोगात्मक कुनैपनि परीक्षा उत्तिर्ण नभएका ८ जनालाई सवारी चालक अनुमतिपत्र वितरण गरिएको देखिएको छ ।

खनाल, गुप्ता र गिरीले भ्रष्टाचार निवारण ऐन, २०५९ को दफा (१३) बमोजिमको कसूर गरेको भन्दै अख्तियारले तीनैजना विरुद्ध १ देखि ३ वर्षसम्मको कैद र ५ हजार रुपैयाँ जरिवाना मागदाबी गर्दै बिहीबार विशेष अदालतमा मुद्दा दायर गरेको छ ।