बेलायत– बेलायतको एसिक्समा एउटा लरी कन्टेनरभित्र बुधबार मृत फेला परेका ३९ जना सबै चिनियाँ नागरिकहरु भएको खुलेको छ।

पूर्वी ग्रेजस्थित वाटरग्लेड औद्योगिक क्षेत्रमा स्थानीय समयानुसार बुधबार कन्टेनरभित्र ३९ जनाको शव भेटिएको थियो ।

हत्याको आशंकामा नोर्दन आयरलन्डका २५ वर्षीय लरी चालक मो रोबिन्सनलाई प्रहरीले बुधबार नै पक्राउ गरेर अनुसन्धान जारी राखेको छ । रोबिन्सन अझै प्रहरी हिरासतमा रहेका छन्।

एसिक्स प्रहरीले शुरूमा सो लरी बल्गेरियाबाट हिँडेको भनेपनि पछि बेल्जियमबाट यूके छिरेको बताएको छ। सो लरी एङ्गलसीको हलिहेड हुँदै शनिवार ब्रिटेन छिरेको थियो।

ब्रिटेनका प्रधानमन्त्री बोरिस जोनसनले यो घटनाबाट आफू स्तब्ध भएको बताएका छन् । शव फेला परेपछि वाटरग्लेड औद्योगिक क्षेत्र बन्द गरिएको छ ।