काठमाडौं– कमल थापा नेतृत्वको राप्रपा संकटमा परेको छ । पार्टीका १४ जना केन्द्रीय नेताले एकैपटक पार्टी छोडेपछि पार्टी अध्यक्ष थापा तनावमा परेका छन् ।

राप्रपा संगठन सुदृढीकरणका लागि मेचीकाली राष्ट्रिय अभियानमा जुटिरहेको बेला पार्टी नेता एवं पूर्वमन्त्री जयन्त चन्दसहितका नेताले पार्टी छोडेका हुन् ।

]शनिवार पार्टी छोडेको घोषणा गर्नेमा सहायक महामन्त्री भरत पाठक, कार्यसम्पादन समितिका सदस्यहरु प्रह्लाद साह, भरत गिरी र विनोद श्रेष्ठ, पूर्व सहायक मन्त्री गोविन्द खनियाँ केन्द्रीय सदस्यहरु चिरागमानसिंह कुँवर, रीता पोखरेल, सुन्दर खडका, गणेशबहादुर विष्ट, गजेन्द्रबहादुर सिंह, विन्दा गिरी लगायत रहेका छन् ।

पार्टीका संस्थापक दुई वरिष्ठ नेता पशुपति शम्शेर राणा र प्रकाशचन्द्र लोहनीबीच एकता भएर बनेको राप्रपा( संयुक्त) प्रति नेता कार्यकर्ता आकर्षित भएका र उनीहरु एकीकृत राप्रपामा प्रवेश गर्ने तयारी गरिरहेको बताइएको छ ।

चन्दसहितका नेताले विज्ञप्ति जारी गर्दै आफूहरु लामो समयदेखि एकता प्रकृयामा संलग्न रहेको उल्लेख गर्दै त्यसको संकेत गरेका छन् ।