वाशिंटन डीसी– पदबाट मुक्त भएपछि राष्ट्रपति डोनाल्ड ट्रम्पविरुद्ध अमेरिकी राजनीतिक प्रणालीमा बाधा हालेको विषयमा अभियोग लगाउन सकिने अमेरिकी न्याय मन्त्रालयका पूर्व विशेष अभियोजनकर्ता रोबर्ट मुल्लरले जनाएका छन् ।

सन् २०१६ मा भएको निर्वाचनमा रुसले गरेको भनिएको हस्तक्षेपबारे अनुसन्धान गरेका मुल्लरले कंग्रेसको न्याय समितिको सुनुवाईका क्रममा पदमा रहेका राष्ट्रपतिलाई आपराधिक अभियोग लगाउन नसकिने भएकाले ट्रम्प पदबाट मुक्त भएपछि भने उनीविरुद्ध न्याय प्रणालीमा बाधा हालेको अभियोग लगाउन सकिने बताएका हुन् ।

ट्रम्पले यसअघि भन्दै आएको यो अभियोगबाट पूर्णतः सफाइ पाइसकेको कुरा असत्य भएको समेत मुल्लरले बताए । उनले ट्रम्पले रुसीहरुसँग साँठगाँठ गरेको विषयमा अपर्याप्त प्रमाण पाएको समेत बताए ।