अमेरिका– गोप्य दस्तावेज सार्वजनिक गरेर तहल्का मच्चाएको वेबसाइट विकिलिक्सका संस्थापक जुलियन असान्जविरुद्ध जासुसी गरेको थप नयाँ १७ अभियोग अमेरिकी अदालतमा दर्ता गरिने भएको छ ।

अमेरिकाको न्याय मन्त्रालयले असान्जविरुद्ध जासुसी अभियोगमा थप १७ अभियोग दर्ता गरिने जनाएको हो । उनले अमेरिकी सेनाकी पूर्व जासुसी विश्लेषक चेल्सी मेनिङसँग मिलेर गैरकानूनी रुपमा अमेरिकी गोप्य सैनिक दस्तावेज सार्वजनिक गरेको गोप्य श्रोतहरुको विवरण खुलाएको र उनको यस्तो कदमबाट ठूलो सङ्ख्यामा मानिसहरुको ज्यान जोखिममा पर्न गएको लतायतका अभियोग लगाइएको छ ।

यसअघि उनीविरुद्ध अमेरिकी सेनाविरुद्ध षड्यन्त्र गरी सन् २०१० मा गोप्य दस्तावेज सार्वजनिक गरेको अभियोग लगाइएको थियो । यी सबै अभियोगमा दोषी पाइए उनलाई कम्तीमा १७० वर्षको जेलसजाय हुने अमेरिकी सञ्चारमाध्यमले जनाएका छन् ।

यसअघि उनलाई लण्डनमा रहेको इक्वेडोरको राजदूतावासमा शरण दिँदै आएपनि इक्वेडोरले उनको शरण फिर्ता लिएपछि उनी हाल बेलायती जेलमा छन् । बेलायतमा उनलाई अमेरिका सुपुर्दगी गर्ने प्रक्रिया चलिरहेको बताइएको छ ।