सिक्किम– भारतको इतिहासमा सबैभन्दा लामो समय २५ वर्षसम्म राज्यमा सरकार चलाएका सिक्किमका मुख्यमन्त्री पवन चाम्लिङको पार्टी विधानसभा चुनावमा पराजित भएसँगै मुख्यमन्त्रीका रुपमा उनको अविराम यात्रा पनि सकिएको छ ।

विधानसभाको चुनावमा प्रेमसिंह तामाङको सिक्किम क्रान्तिकारी मोर्चाले ३२ सिट मध्ये १७ सिटमा विजय हासिल गरेपछि मुख्यमन्त्रीका रुपमा चाम्लिङको यात्रामा विराम लागेको हो ।

बिहीबार सार्वजनिक भएको मत परिणाम अनुसार चाम्लिङ नेतृत्वको सिक्किम डेमोक्र्याटिक फ्रन्टले केबल १५ सिट जितेको छ ।

सन् १९९४ देखि चाम्लिङ सिक्किमका मुख्यमन्त्री रहँदै आएका थिए । राज्यमा सरकार बनाउन १६ सिट आवश्यक पर्नेमा तामाङ्ले राज्यमा नयाँ सरकार गठन गर्नेछन् ।

सन् २०१४ मा भएको अघिल्लो विधानसभा चुनावमा तामाङ नेतृत्वको सिक्किम क्रान्तिकारी मोर्चाले १० सिट जितेको थियो भने चाम्लिङ नेतृत्वको सिक्किम डेमोक्र्याटिक फ्रन्टले २२ सिट जितेको थियो ।

त्यस्तै राज्यका लागि छुट्याइएको १ लोकसभा सिटमा पनि तामाङको पार्टी नै विजयी भएको छ ।