इलाम– हराएको पासपोर्ट (राहदानी) बनाउनका लागि ६ हजार रुपैयाँ घुस माग्ने कर्मचारीसहित २ जना पक्राउ परेका छन् ।

जिल्ला प्रशासन कार्यालय इलामका नायव सुब्बा विनोद विसीले हराएको पासपोर्टको प्रतिलिपि बनाउन सेवाग्राहीसँग ६ हजार रुपैयाँ घुस मागेका थिए । उक्त घुस रकम उठाउनका लागि युवा स्वरोजगार कार्यक्रमका स्वंयसेवक भानुभक्त आचार्यलाई परिचालन गरिएको थियो ।

आचार्यले सेवाग्राहीबाट ६ हजार रुपैयाँ उठाएर नायव सुब्बा विसीलाई बुझाउँदा दुवैजना पक्राउ परेका हुन् ।

अख्तियार दुरुपयोग अनुसन्धान आयोगको इटहरीस्थित कार्यालयबाट खटिएको टोलीले दुवैजनालाई जिल्ला प्रशासन कार्यालय इलामबाट पक्राउ गरेको हो ।

पक्राउ परेकामाथि थप अनुसन्धान भइरहेको अख्तियारले जनाएको छ ।