एजेन्सी — इन्डियन प्रिमियर लिग (आईपीएल) को इतिहासमै शनिबार रोयल च्यालेन्जर्स बैंङ्लोरले कमजोर शुआत गरेको छ ।

आईपीएलको १२ औं संस्करणको उद्घाटन खेलमा चेन्नाई सुपर किङ्ससँग प्रतिस्पर्धा गरेको बैंङ्लोरले आईपीएल इतिहासमै कमजोर सुरुआत गरेको भारतीय सञ्चारमाध्यमहरुले उल्लेख गरेका छन् ।

भारतीय राष्ट्रिय टोलीका कप्तान विराट कोहलीले नेतृत्व गरेको बैंङ्लोर, कप्तान कोहलीको विकेट पतन भएसँगै कमजोर बनेको थियो ।

कप्तान कोहली ६ रनमा आउट हुँदा चेन्नाईका स्पिनर हरबजन सिंह र इमरान ताहिरले उत्कृष्ट बलिङ गर्दै बैंङ्लोरलाई कमजोर सावित गरे ।

बैंङ्लोरले १७ ओभर १ बलमा सबै विकेट गुमाएर ७० रन मात्रै बनाउन सक्यो । जुन आईपीएल उद्घाटन खेलको इतिहासमै सानो लक्ष्य बन्यो ।

बैङ्लोर मात्रै यस्तो टिम हो जसले उद्घाटन खेलमा विपक्षीसामू २ पटक सय रन भन्दा कम रनको लक्ष्य प्रस्तुत गरेको छ । यसअघि सन् २००८ मा बैङ्लोरले कोलकत्ताविरुद्धको आईपीएल उद्घाटन खेलमा ८२ रनको लक्ष्य दिएको थियो ।

योसँगै बैङ्लोर चार पटक आईपीएलमा सय रन भन्दा कम रन बनाएको छ । यसअघि सन् २०१४ मा युएईको अबुधावीमा भएको खेलमा पनि बैङ्लोर ७० रनमै समेटिएको थियो ।

बैंङ्लोरले दिएको यो अहिलेसम्मकै दोस्रो सानो लक्ष्य हो । सन् २०१४ मा बैङ्लोर कोलकत्ता नाइट राइडर्ससँग ४९ रनमा आउट भएको थियो ।

कप्तान विराट कोहलीले खेल पछि विकेट लगतार जानुले टोलीले ब्याटिङ सुधार्न नसकेको बताएका थिए । त्यस्तै, विजयी टिमका कप्तान महेन्द्रसिंह धोनीले पनि रन नबन्नुमा विकेट ब्याटिङ फेवर नभएको बताएका थिए ।