लिस्बन- पोर्चुगलको लिस्बनमा भएको मिनी म्याराथुनमा नेपाली बालकले राष्ट्रिय झण्डा बोकेरै २ किलोमिटरको दौड पूरा गरेका छन् ।

अटिजम एस्पेक्ट्रम डिसअर्डर भएका ती नेपाली बालकले नेपाली राष्ट्रिय झन्डा बोकेर लिस्बन म्याराथुन पूरा गरेका हुन् ।

लिस्बन मिनी म्याराथनमा ७ वर्षे युरेश पाण्डेयसँगै उनका भाइ युरेक पाण्डेयले पनि भाग लिएका थिए । म्याराथन क्लब पोर्चुगलको आयोजनामा गत शनिबार राजधानी लिस्बनमा “ईडीपी मिनी च्याम्पियन्स म्याराथन” भएको हो ।

युरेशमा अटिजमको पहिलो लक्षण तीन बर्षको उमेरमा देखिएको उनका पिता गणेश पाण्डेय बताए । बोल्न नसक्ने बौद्धिक अपागंता भएका आफ्ना छोराले मिनी म्याराथनमा दौड पूरा गर्दा आफूलाई निकै खुशी लागेको उनले बताए ।

युरेश र युरेक दुबै दाजुभाइले नेपालको राष्ट्रिय झण्डासहित प्रतियोगितामा सहभागी भएका थिए । ४ देखि ७ बर्ष सम्मका झण्डै ५ सय बालबालिकाहरुबीच भएको प्रतियोगितामा दौड पूरा गर्ने बालबालिकाहरुलाई मेडल प्रदान गरिएको थियो ।