काठमाडौं– सर्लाहीका ‘मिटरब्याजी’परदेशी भनिने श्यामकृष्ण साहको प्रहरीले पोलिग्राफ परीक्षण गरेको छ । सर्वसाधारणलाई ऋण दिएर पाँचौं गुणा चक्रवर्ती ब्याज उठाउने साहको सोमबार पोलिग्राफ परीक्षण गरिएको हो ।

सर्लाहीका प्रहरी उपरीक्षक गोपालचन्द्र भट्टराईका अनुसार रौतहट चन्द्रनिगाहापुरस्थित २ नम्बर प्रदेश प्रहरी कार्यालयको पोलिग्राफमा लगेर साहको बयान परीक्षण गरिएको हो।

भट्टराईका अनुसार उनले दिएको बयान कतिको सत्य छ/छैन भनी पोलिग्राफबाट परीक्षण गरिएको हो । उनीविरूद्ध सर्लाही लालबन्दी नगरपालिका-४ की रुकमिणी चौधरीसहित ३८ जनाले ठगी मुद्दामा जाहेरी दिएका छन्।

प्रहरीले २५ दिनभित्र साहविरूद्ध सरकारी वकिलको कार्यालयमा मुद्दा अभियोजन गर्दैछ। साह पक्राउ परेको सोमबार २२ दिन पुगेको छ।

बयानको सत्यता परीक्षण गर्न पोलिग्राफ परीक्षण गर्ने गरिएको छ। यसको रिपोर्ट भने आइनसकेको भट्टराईले बताए । पोलिग्राफ परीक्षणलाई मुद्दा अभियोजन सिलसिलामा भएका अन्यजस्तै सहयोगी प्रमाणको रूपमा लिइन्छ।

सर्लाही प्रहरीले उनको सम्पत्ति छानबिन तथा अनुसन्धान गरिरहेको छ। सम्पत्ति शुद्धीकरण अनुसन्धान विभागले कार्यादेश दिएपछि प्रहरीले सम्पत्ति छानबिन गरिरहेको हो।

सर्लाही मलंगवा नगरपालिका-१० घर भएका साहलाई उनकै निवासबाट प्रहरीले भदौ १५ गते साँझ पक्राउ गरेको थियो ।