एजेन्सी– संसदीय बैठकमा तीन मिनेट ढिला पुगेपछि जापानका ओलम्पिक मन्त्रीले माफी माग्न बाध्य भएका छन् । जापानको ओलम्पिक मन्त्री योशिताका साकुरादा बिहीबारको संसदीय बैठकमा तीन मिनेट ढिला पुग्दा सार्वजनिकरुपमा माफी मागेका हुन् ।

यता जापानका विपक्षी नेताहरुले भने उनी बैठकमा ढिला आएर ओलम्पिक मन्त्रालयको बेइज्जत गरेको भन्दै उनको राजीनामा माग गरेका छन् । उनी ढिला आएको बदलामा विपक्षी दलका सांसद्हरुले संसद्को बजेट समितिको बैठक बहिष्कार गरेका थिए ।

गत साता उनले ओलम्पियन रिकाको इकीलाई रगतको क्यान्सर भएपछि उनीबाट स्वर्ण पदकको आशा सकिएको जनाएका थिए । उनले मानवतालाई भन्दा पनि स्वर्ण पदकलाई महत्व दिएको भन्दै त्यसबेला पनि विपक्षीले उनको आलोचना गरेका थिए । त्यसअघि साइबर सुरक्षा मन्त्री समेत रहेका उनले गत वर्ष आफूले हालसम्म कम्प्युटर नचलाएको बताएपछि पनि उनी चर्चित बनेका थिए ।

जापानको राजधानी टोकियोले सन् २०२० मा ओलम्पिक खेलकुदको आयोजना गर्दैछ । त्यसैका लागि उनलाई गत अक्टोबरमा ओलम्पिक मन्त्री नियुक्त गरिएको थियो । जापानमा समयलाई अति नै महत्व दिने गरिन्छ ।