काठमाण्डौं-  सन् १९५३ को २९ मेमा तेन्जिङ नोर्गे शेर्पा र एडमण्ड हिलारीले ‘दक्षिण कोल’बाट सगरमाथाको सफल आरोहण गरिसकेपछि हालसम्म सयौँले सगरमाथाको सफल आरोहण गरिसकेका छन् ।

सगरमाथाको सफल आरोहण गर्ने हरेक आरोहीको सपना हुन्छ । तर, कीर्तिमानी आरोही कामिरिता शेर्पाले भने २२ पटक सगरमाथाको सफल आरोहण गरिसकेका छन् । सन् १९९४ मे १३ मा पहिलोपटक सगरमाथाको सफल आरोहण गरेयता उनी २२ पटक सर्वोच्च शिखरमा पुगिसकेका छन् ।

सोलुखुम्बु जिल्लाको थामे गाउँमा बसोबास गर्दै आएका शेर्पाले सगरमाथाबाहेक अन्नपुर्ण चौथो, चो ओयु, ल्होत्से, माउण्ट केटु, मनास्लुलागतका शिखरको सफल आरोहण गरिसकेका छन् ।

सन् १९९४ मा मे १३ मा पहिलोपटक सगरमाथाको शिखरमा पुगेका शेर्पाले पछिल्लो पटक भने अघिल्लो वर्ष मे १६ मा सगरमाथाको शिखर चुमेका थिए । त्यसबीच उनले २२ पटक सगरमाथाको सफल आरोहण गरिसकेका छन् ।

२२ पटक सगरमाथा आरोहणसहित उनले हालसम्म ८ हजार मिटर उचाईमाथिका हिमालहरुको ३४ पटकसम्म आरोहण गरिसकेका छन् ।

सगरमाथाबाहेक उनले ८,२०१ मिटर उचाईको चो ओयु हिमालको ८ पटक, ल्होत्सेको एकपटक, माउण्ट केटु हिमालको एकपटक तथा मनास्लुको दुईपटक सफल आरोहण गरेका छन् ।

उनी हाल २३ औँ पटक सगरमाथाको आरोहण गरी नयाँ कीर्तिमान राख्ने विचारमा छन् ।