काठमाडौं- राष्ट्रिय मानव अधिकार आयोगले विप्लव नेतृत्वको नेपाल कम्युनिष्ट पार्टीका सर्लाही जिल्ला ईन्चार्ज कुमार पा‌ैडेलकलो हत्यासम्बन्धि प्रतिवेदन १५ दिनभित्र सार्वजनिक गर्ने बताएको छ ।

जनअधिकार अभियान नेपालले मोरङको विराटनगरमा गरेको अन्तरक्रिया कार्यक्रममा बोल्दै आयोगका सदस्य गोविन्द शर्माले बढीमा १५ दिनमा पूर्ण रिपोर्ट सार्वजनिक गर्ने बताए ।

उनले भने,‘सर्लाहीमा भएको घटनाको हामी बढीमा १५ दिनभित्र प्रतिवेदन सार्वजनिक गर्छौ ।’

यसअघि प्रारम्भिक रिपोर्ट सार्वजनिक गर्दै कुमार पौडेलको गैरन्यायिक हत्या भएको बताएको थियो। सदस्य शर्माले संसदले कुमार हत्याकाण्डको छानविनमा हस्तक्षेप गर्न खोजेको भन्दै असन्तुष्टि जनाए ।

उनले भने, ‘हामीले छानविन गरिरहेकाबेला संसदीय समितिको कुरो आयो यो त भएन, यो निष्पक्ष छानविनमाथि हस्तक्षेप हो, संसदले न हामीलाई निर्देशन दिन मिल्छ न त अरू किन चाहीयो छानविन समिति ? यो गलत छ ।’

उनले राजनीतिक दलहरूले आफूलाई चाहिंदा मात्रै मानवअधिकारको कुरा गर्ने गरेको आरोप लगाए । अहिले सरकारले मानवअधिकार आयोगका सुझाव १२ प्रतिशत मात्रै कार्यान्वयन भएको भन्दै आश्चर्य व्यक्त गरे ।