काठमाडौं– सुदूरपश्चिम तथा कर्णाली प्रदेशको प्रमुख चाडका रुपमा रहेको गौरा पर्व (गोरा पर्व)को मुख्य दिन शुक्रबार दूर्वाष्टमी अर्थात् अठ्यावली पर्व मनाइँदै छ ।

अघिल्लो दिन (बिहीबार) गौराघरमा भित्र्याएको गौरालाई आज बाहिर गोराखलो (आँगन)मा ल्याएर पूजा गरिन्छ । पूजा गरेपछि गौरालाई पुनः गोराघरमा भित्र्याइन्छ ।

अठ्यावलीका दिन भगवन शिव (महेश्वर)लाई पतिका रुपमा पाउनका लागि माता पार्वती (गौरा)ले गरेको तपस्याबारे वर्णन गरिन्छ । अठ्यावलीका रुपमा भगवान शिव र पार्वतीको गाथा गाइन्छ । भगवान् शिवप्रति पार्वतीको प्रेमकथालाई लयात्मक ढंगले प्रस्तुत गर्ने गरिन्छ । जसलाई अठ्यावली सुनाउने भनिन्छ ।

शुक्रबार सुदूरपश्चिम तथा कर्णालीसँगै संघीय राजधानी काठमाडौंमा पनि गौरा पर्व मनाइएको छ ।

राजधानी काठमाडौंमा रहेका सुदूरपश्चिम तथा कर्णालीबासीहरुले काठमाडौंस्थित टुँडिखेलमा गौरा पर्व मनाएका हुन् ।

गौरा पर्वको अवसरमा टुँडिखेलमा विशेष कार्यक्रम आयोजना गरिएको थियो ।

गौरामा महिलाहरुले अठ्यावली गाएजस्तै पुरुषहरुले चैत र धुमारी गाउने गर्छन् । यस्तो चैत धमारीहरु भगवान शिव, पार्वती, कृष्ण लगायतको गाथामा आधारित हुन्छ ।

गौरा पर्वमा सुदूरपश्चिम तथा कर्णालीको मौलिक लोक भाका एवम् नृत्य देउडा खेल्ने गरिन्छ । राजधानी काठमाडौंमा रहेका सुदूरपश्चिमेलीहरुले पनि टुँडिखेलमा देउडा खेलेका छन् ।

तस्वीर- अदीप श्रेष्ठ