काठमाडौं– आकस्मिक रुपमा नेपालमा आएका भारतीय गुप्तचर संस्था रिसर्च एन्ड एनालाइसिस विङ (रअ) का प्रमुख समान्तकुमार गोयल २ दिन नेपाल बसेर फर्किएका छन् ।

गोयल नेतृत्वको ५ सदस्यीय टोली आइतवार काठमाडौंमा आएको थियो । रअ प्रमुख गोयल नेतृत्वको टोली नेपाल बसाई पाँच दिनभन्दा लामो हुने बताइए पनि बसाई छोट्याएर फर्किको उच्च सुरक्षा स्रोतले बतायो । रअको टोली बौद्धस्थित हायात होटलमा बसेको थियो ।

गत महिना रअ प्रमुख नियुक्त भएपछि गोयलको यो पहिलो नेपाल भ्रमण हो । उनी यसअघि पनि रअका विशेष सचिवका रुपमा कार्यरत थिए ।

भ्रमण टोलीमा रअको राजनीतिक ब्यूरो हेर्ने पदाधिकारीसमेत सहभागी थिए। उनीहरुले नेपालमा रहँदा उच्च राजनीतिक भेटघाट गरेको बताइएको छ ।  भारतीय प्रधानमन्त्रीको रुपमा नरेन्द्र मोदीले दोस्रो पटक सत्ता सम्हालेपछि रअका उच्च अधिकारीको यो पहिलो नेपाल भ्रमण हो ।

मोदीले नेपाल भ्रमण गर्ने विषय चर्चामा रहेको बेला रअका प्रमुखको नेपाल भ्रमणलाई अर्थ पूर्ण रुपमा लिइएको छ ।