रुकुम– रुकुम पूर्वमा ट्याक्टर दुर्घटना हुँदा एक जनाको मृत्यु भएको छ । देउखोलाबाट सदरमुकाम रुकुमकोटतर्फ आउँदै गरेको रा १ त २५९२ नम्बरको ट्याक्टर भुमे गाउँपालिका ५ को बालुवा भन्ने ठाउँमा दुर्घटना भएको हो ।

ट्याक्टर दुर्घटनामा सिस्ने गाउँपालिका वडा नम्बर ४ अमलाचौरका १५ वर्षीय रामचन्द्र बोहोराको मृत्यु भएको हो । जिल्ला प्रहरी कार्यालय रुकुम पूर्वका अनुसार ट्याक्टर सडकबाट एक सय मिटर तल सानीभेरी नदीमा खसेको छ । दुर्घटनामा परी पुथा उत्तरगंगा गाउँपालिका वडा नम्बर १४ का १६ वर्षीय कृष्ण रसाइली र त्रिवेणी गाउँपालिका ५ रुकुम पश्चिमका १७ वर्षीय लक्ष्मण वली घाइते भएका छन् ।

घाइतेहरुलाई स्वास्थ्यचौकी रुकुमकोटमा सामान्य उपचारपछि थप उपचारका लागि जिल्ला अस्पताल सल्ले रुकुम पश्चिम रिफर गरिएको प्रहरी निरीक्षक वीरबहादुर सुनारले जानकारी दिए । ट्याक्टर चालक दाङका २२ वर्षीय अनन्त रावत प्रहरी नियन्त्रणमा रहेको र थप अनुसन्धान भइरहेको प्रहरीले जनाएको छ ।