सुनसरी– सुनसरीको इटहरी उपमहानगरपालिकाका कर्मचारी आन्दोलनमा उत्रिएका छन् । इटहरीका मेयर द्वारिकलाल चौधरीले कर्मचारीलाई कुटपिट गरेको भन्दै कर्मचारीहरु काम ठप्प पार्दै आन्दोलित भएका हुन् ।

उपमहानगरपालिकामा कार्यरत कर्मचारीहरुले उपमेयर लक्ष्मी गौतम र प्रमुख प्रशासकीय अधिकृत केशव विमलीलाई ज्ञापन पत्र बुझाए । मेयरको गतिविधिले काम गर्न असुरक्षित भएको भन्दै कर्मचारीहरुले सुरक्षित काम गर्ने वातावरण बनाउन माग गरेका छन् । उनीहरुले कर्मचारी कुटपिट गर्ने मेयरलाई कानुन बमोजिम कारबाहीको माग गरेका छन् ।

यता, ज्ञापन पत्र बुझ्दै उपमेयर लक्ष्मी गौतमले अप्रिय घटना भएको भन्दै दुःख व्यक्त गरिन् । उनले भनिन, ‘अबका दिनमा यस्ता घटना घट्दैनन्, ढुक्क हुनुस् शान्तिपूर्ण काम गर्ने वातावरण तयार हुन्छ ।’

बुधबार मेयर द्वारिकलाल चौधरीले पैसा लिएर काम गरेको भन्दै सब इन्जिनियर राम बहादुर खड्कालाई बर्खास्त गरेका थिए । यस्तै वडा नम्बर १९का वडा सचिव मनोज दहाललाई कुटपिट गरेका थिए । घरनक्सा फाँटका कर्मचारी खड्काले सेवाग्राहीको काम गरिदिए बापत पैसा लिएको मेयरको आरोप छ ।

यता, कर्मचारी बर्खास्त र कुटिपिटको बारेमा कुराकानी गर्न गएका दुई पत्रकारलाई पनि मेयर चौधरीले दुव्र्यवहार गरेका थिए । पत्रकार विकल रेग्मी र कृष्ण भट्टराईलाई दुव्र्यवहार गरेपछि नेपाल पत्रकार महासंघले विज्ञप्ती निकालेर विरोध जनाएको छ । महासंघले दुव्र्यवहार गर्ने मेयरले माफी माग्नुपर्ने माग गरेको छ ।