एजेन्सी– स्पेनिस ला लिगा अन्तर्गत गएराति भएको खेलमा बार्सिलोना पराजित भएको छ ।

लियोनल मेस्सी र स्टार किशोर खेलाडी आन्सु फातीसहितको बार्सिलोना शनिबार राति भएको खेलमा ग्रानाडा सँग २–० गोल अन्तरले पराजित भएको हो ।

घरेलु मैदानमा भएको खेलमा ग्रानाडाले पहिलो हाफमा एक र दोस्रो हाफमा एक गोल गरेको हो । पहिलो हाफमा बार्सिलोनाको टिममा मेस्सी र फाती थिएनन् । दोस्रो मिनेटमा नै रामोन अजीजले गोल गर्दै ग्रानाडालाई सुरुवाति अग्रता दिलाए ।

बार्सिलोनाका प्रशिक्षकले दोस्रो हाफमा टिममा मेस्सी र फातीलाई समावेश गरे । तर पनि गोल खायो बार्सिलोनाले । ग्रानाडाका लागि ६६ औँ मिनेटमा पाएको पेनाल्टीमा अल्भारो माडिल्लोले गोल गरे ।

लिगमा बार्सिलोनाले पछिल्लो २५ वर्षयताकै खराब सुरुवात गरेको छ । उसले सन् १९९४–९५ सिजन यताकै यस्तो खराब सुरुवात गरेको थिएन । उसले पाँच खेलबाट मात्रै सात अंक जोडेको छ र सातौँ स्थानमा छ ।

जित निकालेको ग्रानाडा पाँच खेलबाट १० अंकसहित शीर्ष स्थानमा छ । एथ्लेटिको मड्रिडले शनिबार राति नै भएको खेलमा सेल्टा डी भिगोसँग गोलरहित बराबरीमा रोकिएर शीर्ष स्थानमा पुग्ने मौका गुमाएको हो ।

अरु खेलमा भिल्ला रियलले रियल भालाडोलिडलाई २–० ले पराजित गरेको छ भने लेभान्टे र एइबरले गोल रहित बराबरी खेलेका छन् ।