वाशिंटन डीसी– वर्ष सन् २०१८ मा प्राकृतिक ग्यास तथा पेट्रोलियमको उत्पादनमा अमेरिकाले कीर्तिमान कायम गरेको छ ।

अमेरिकाको उर्जा सूचना प्रशासन ईआईएले जनाएअनुसार सन् २०१८ मा अमेरिकाको पेट्रोलियमको उत्पादन १६ प्रतिशत तथा प्राकृतिक ग्यासको उत्पादन १२ प्रतिशतले बढेको छ ।

सन् २०१८ मा अमेरिकाको कच्चा तेलको उत्पादन १७ प्रतिशतले बढेर हरेक वर्ष १ करोड १० लाख ब्यारेल प्रतिदिन पुगेको ईआईएले जनाएको छ । त्यस्तै, सुख्खा प्राकृतिक ग्यासको उत्पादन १२ प्रतिशतले बढेर ८० करोड ७० लाख घनमिटर प्रतिदिन पुगेर कीर्तिमान रादेको जनाइएको छ ।

त्यस्तै, विश्वव्यापी माग बढेका कारण रुसको कच्चा तेल तथा प्राकृतकि ग्यासको उत्पादनले पनि नयाँ कीर्तिमान कायम गरेको छ । यता साउदी अरबको कच्चा तेलको वार्षिक औसत उत्पादन पनि केही बृद्धि भएको छ । यद्यपि साउदी अरबको कच्चा तेलको उत्पादन सन् २०१६ को तुलनामा केही कम रहेको ईआईएले उल्लेख गरेको छ । सन् २०१६ मा साउदी अरबको कच्चा तेलको उत्पादन कीर्तिमानी स्तरमा पुगेको थियो ।

सन् २०११ मा रुसलाई उछिन्दै अमेरिका विश्वमा सबैभन्दा धेरै प्राकृतिक ग्यास उत्पादन गर्ने मुलुक बन्न पुगेको थियो भन् सन् २०१८ मा अमेरिकाले कच्चा तेलको उत्पादनमा पनि उछिनेको थियो ।