काठमाडौं– नेपालको दुई दिने भ्रमणमा रहेका भारतीय विदेश मन्त्री एस जयशंकर विहीबार स्वदेश फर्किएका छन् ।

नेपाल–भारत संयुक्त आयोगको बैठकमा सहभागी हुन बुधबार नेपाल आएका विदेशमन्त्री जयशंकश आज दिउँसो स्वदेश फर्किएका हुन् ।उनलाई त्रिभुवन अन्तर्राष्ट्रिय विमानस्थलमा नेपालका लागि भारतीय राजदूत मन्जीव सिंह पुरी लगायतले बिदाई गरेका थिए ।

नेपाल भ्रमणमा रहँदा विदेशमन्त्री जयशंकरले नेपाल–भारत आयोगको पाँचौं बैठकलाई सम्बोधन गर्नुका साथै महत्वपूर्ण राजनीतिक भेटवार्ता गरेका थिए ।

नेपाल आए लगत्तै प्रधानमन्त्री केपी शर्मा ओलीसँग भेटवार्ता गरेको पुरीले बुधबार साँझ राजधानीको याक एण्ड यतीमा भएको नेपाल–भारत संयुक्त बैठकलाई सम्बोधन गरेका थिए । त्यस्तै, विहीबार विहान पशुपतिनाथ मन्दिरको दर्शन गरी राष्ट्रपति विद्यादेवी भण्डारीसँग भेटवार्ता गरेका थिए ।

भेटमा दुई देशबीचको सम्बन्ध र आपसी हीतका विषयमा छलफल भएको थियो । नेपाल–भारत सम्बन्धलाई मजबुद बनाउन भ्रमण फलदायी भएको उनले बताएका छन् ।

नेपाल–भारत संयुक्त आयोगको पाँचौं बैठकमा  दुई मुलुकबीच सम्बन्ध प्रगाढ बनाउने विषयमा छलफल भएको थियो । नेपाल–भारतका समग्र विषय समेटिएका ८० बुँदामा माइनुट भएको परराष्ट्र सचिव शंकरदास बैगारगीले जानकारी दिए ।

छलफल राजनीति, सीमा सुरक्षा/सिमांकन, व्यापार /पारवहन, उर्जा/जलस्रोत र शिक्षा, संस्कृति र पर्यटनका साथै दुई पक्षीय सम्बन्ध र चासोका विषयमा केन्द्रित रहेको थियो ।