काठमाडौँ– पूर्वप्रधानमन्त्री तथा संघीय समाजवादी पार्टीका नेता डाक्टर बाबुराम भट्टराई प्रतिनिधिसभामा सत्तारुढ दलको सिटमा बस्न थालेका छन् ।

विहीवारको संसद बैठक शुरु हुनासाथ सभामुख कृष्णबहादुर महराले संघीय समाजवादी फोरम र नयाँ शक्ति पार्टी नेपालबीच एकता भएको जानकारीसहितको पत्र प्राप्त भएको जानकारी गराएका थिए ।

संसदमा राष्ट्रिय दलको मान्यता पाउन नसकेको तत्कालिन नयाँ शक्ति पार्टीका तर्फबाट निर्वाचित भएका डाक्टर भट्टराई प्रतिनिधिसभामा स्वतन्त्र सांसद बस्ने सिटमा बस्दै आएका थिए । तर पार्टी एकतापछि उनी सत्तारुढ दलको सांसदका रुपमा रहेका छन् ।

निर्वाचन आयोगले पार्टी एकताबारे संसदलाई जानकारी नगराएका कारण उनी स्वतन्त्र सांसदका रुपमा संसदमा बस्दै आएका थिए ।

सामान्यत संसदीय व्यवस्थामा सरकारका मन्त्रीहरुको दायाँतिर प्रमुख प्रतिपक्ष दल र बायाँतिर सत्तारुढ दलका सांसदहरु बस्ने परम्परा छ । त्यही परम्पराअनुसार नेता भट्टराई बिहिबारदेखि सत्तारुढ दलका सांसदहरु रहने स्थानमा सरेका हुन् ।