प्योङयाङ– उत्तर कोरियामा भएको स्थानीय तहका लागि भएको निर्वाचनमा मुलुकका प्रायः सबै मतदाताले मतदान गरेका छन् ।

उत्तर कोरियाली समाचार संस्था केसीएनएले जनाएअनुसार आइतबार भएको निर्वाचनमा ९९.९८ प्रतिशत मतदाताले मतदान गरेका हुन् । यो सङ्ख्या सन् २०१५ मा भएको निर्वाचनको भन्दा ०.०१ प्रतिशत धेरै रहेको बताइएको छ ।

विदेश भ्रमण तथा समुद्रमा काम गर्न बाहिर गएका मतदाता मतदान प्रक्रियामा सहभागि हुन नसकेको केसीएनएले जनाएको छ । एकतन्त्रीय शासन रहेको उत्तर कोरियामा यस्ता निर्वाचन राजनीतिक कर्मकाण्ड पूरा गर्नका लागि मात्र हुने गरेका छन् ।

यस्ता निर्वाचनमा यसअघि नै तय भएका उम्मेद्वारका लागि ‘हो’ वा ‘होइन’ भन्ने दुई विकल्पमा मत दिन पाउने प्रावधान रहेको बताइन्छ । तैपनि ९९ प्रतिशतभन्दा धेरैले ‘हो’ भन्ने विकल्पमा नै मत दिन गरेका छन् ।

उत्तर कोरियाली सञ्चारमाध्यमले भने यस्तो निर्वाचन प्रक्रियाका कारण मुलुकको एकता अझ मजबुत हुने बताउने गरेको छ ।