रोल्पा– पाँच नम्बर प्रदेश सरकारले कृषिमा प्रविधिको प्रयोग गर्दै यान्त्रीकरण गर्ने उद्देश्यले ‘एक निर्वाचन क्षेत्र १ स्मार्ट कृषि गाउँ’ कार्यक्रम ल्याएको छ । जसअनुसार रोल्पा जिल्लामा पनि दुई वटा स्मार्ट कृषि गाउँ स्थापना गरिने भएको छ ।

उक्त स्मार्ट कृषि गाउँ स्थापनाका लागि जिल्लाको निर्वाचन क्षेत्र नं. १ बाट सुनिलस्मृति गाउँपालिका–१ घोडागाउँ र क्षेत्र नं. २ बाट गंगादेव गाउँपालिका–३ जिनाबाङलाई छनोट गरिएको कृषि ज्ञान केन्द्र रोल्पाका प्रमुख नरेश धितालले बताए ।

कार्यक्रम अन्तर्गत रोल्पाका २ वटा गाउँलाई स्मार्ट कृषि गाउँ बनाउँन प्रदेश सरकारले प्रक्रिय थालेको छ । उक्त गाउँमा जलवायु परिवर्तनमा स्मार्ट, सिचाईमा स्मार्ट, माटोको पोषण तत्वमा स्मार्ट, प्रविधिमा स्मार्ट र बजारमा स्मार्ट गर्न प्रदेश सरकारले एक गाउँ बराबर ५० लाखका दरले बजेट विनियोजन गरेको छ ।

स्मार्ट कृषि गाउँ छनोट भएका गाउँमा ५० घरधुरी र २ सय ५० रोपनी जमिनमा मसलाको रुपमा अदुवा, वेसार, मौरीपालन, बाख्रापालन, आलु खेती, रायोको विउ उत्पादन र तरकारी उत्पादन गर्न लागेको कृषि ज्ञान केन्द्र रोल्पाले जनाएको छ ।

त्यस्तै प्रदेश सरकारले साना सिँचाई, सहकारी खेती, कृषि पर्यटन जस्ता नविनतम् कार्यक्रम समावेश गरेको छ । जिल्लामा मसला खेतीको विस्तारका लागि अदुवा र बेसारको व्यावसायिक खेती शुरु गरिएको स्मार्ट कृषि गाउँ कार्यक्रम कार्यान्वयन समितिका अध्यक्ष बलबहादुर खत्रीले बताए ।

५ नम्बर प्रदेशको १२ जिल्लामा ५२ वटा गाउँ स्मार्ट कृषि गाउँका रुपमा छनोट भएका छन् । ४ वर्षमा सो गाउँका युवा कृषकहरुको क्षमता अभिवृद्धि गरी कृषिमा प्रदेशलाई आत्मनिर्भर बनाउने कार्यक्रमको लक्ष्य रहेको छ ।