एजेन्सी– इंग्लिस प्रिमियर लिगमा कार्डिफ सिटीलाई पराजित गरेको लिभरपुल शीर्ष स्थानमा उक्लिएको छ ।

आइतबार राति भएको खेलमा कार्डिफलाई २–० गोल अन्तरले पराजित गर्दै लिभरपुलले शनिवार शीर्ष स्थानमा उक्लिएको म्यानचेस्टर सिटीलाई पछि पारेको हो ।

कार्डिफको घरेलु मैदानमा लिभरपुलको जीतमा जर्जिनियो विजनाल्डम र जेम्स मिल्नरले समान एक–एक गोल गरेका थिए । खेलको ५६ औं मिनेटमा विजनाल्डमले गोल गर्दै लिभरपुललाई अग्रता दिलाए । त्यस्तै, खेलको ८१ औं मिनेटमा मिल्नरले पेनाल्टीमार्फत् गोल गर्दै लिभरपुलको जित सुनिश्चित गरे ।

जितसंगै शीर्ष स्थानको लिभरपुल दोस्रो स्थानको सिटी भन्दा २ अंकले अघि रहेको छ । लिभरपुलले ३५ खेलबाट ८८ अंक जोडेको छ । सिटीले ८६ अंक छ । उपाधिका लागि सिटी र लिभरपुलबीच निकै प्रतिस्पर्धा भइरहँदा खेल पनि रोचक हुँदै गएका छन् ।