विराटनगर– साफ महिला च्याम्पियनसिपको फाइलनमा नेपाली महिला टोलीले पहिलो हाफमा भारतीय टोलीविरुद्ध बराबरी खेलेको छ । विराटनगरस्थित शहीद रंगशालामा जारी खेलमा नेपालले भारतसँग १—१ गोल बराबरी खेलेको हो ।

खेलमा शुरुवाती अग्रता लिएको भारतविरुद्ध नेपालकी सावित्रा भण्डारीले गोल गर्दै टोलीलाई खेलमा फर्काएकी थिइन् । उनले खेलको ३३ औं मिनेटमा हेड मार्फत् गोल गर्दै भारतविरुद्ध बराबरी गरिन् ।

यसअघि खेलको २६ औं मिनेटमा भारतको तर्फबाट डालीमा छिब्बरले गोल गर्दै घरेलु टोलीविरुद्ध शुरुवाती अग्रता दिलाएकी थिइन् । नेपालका लागि हिरा कुमारी भुजेलले फाउल गरेपछि भारतकी फ्रिकिक एक्सपट छिब्बरको प्रहारले पोष्ट चुमेको थियो । नेपाली गोलकिपर एन्जीला तुम्बा हम्बे सुब्बाले डाइफ हाने पनि गोल रोक्न असफल रहिन् ।

लगातार चार संस्करणको विजेता भारतलाई रोक्दै इतिहास रच्ने लक्ष्यमा रहेको नेपाली टोलीले भारविरुद्ध उत्कृष्ट प्रदर्शन गरिरहेको छ । नेपाली टोलीले हजारौं दर्शकको साथ र हौसल पनि पाएको छ । प्रत्यक्ष खेल हेर्न हजारौं दर्शक रंगशाला आएपछि प्याराफिट खचाखच भरिएको छ ।