क्वालालम्पुर- मलेसियामा सुपरभाइजरलाई कुटेर हत्या भएको घटनमा संलग्न रहेको अभियोगमा पक्राउ परेका दुई नेपाली प्रहरी हिरासतबाट मुक्त भएका छन् ।

उनीहरुलाई अदालतको आदेशमा छोडिएको हो । शुक्रवार पेतालिङजया मजिष्ट्रेट कोर्टको आदेशमा रिहा भएका उनीहरुलाई शुक्रवार नै नेपाल पठाइएको छ ।

यो मुद्दामा नेपाली कामदारको पक्षबाट लडेकी अधिवक्ता खारेन जित कौरका अनुसार सुरक्षा गार्डका रुपमा कार्यरत ती दुई नेपालीलाई चिनियाँ सुपरभाइजरलाई कुटेर हत्या गरेको घटनामा संलग्न रहेको अभियोगमा प्रहरीले पक्राउ गरेको थियो ।

समयमा तलव नपाएको भन्दै मोटरसाइकल चालकले लगाउने हेल्मेटले सुपरभाइजरलाई कुटेको भिडियो यसअघि सामाजिक सञ्जालमा सार्वजनिक भएको थियो ।

घटना क्वालालम्पुरस्थित रिगाल सेक्यूरिटी कम्पनीमा गत २ सेप्टेम्वरमा भएको थियो । सो घटनामा कुटपीटका कारण सुपरभाइजर एक चिनियाँ नागरिकको मृत्यु भएको थियो ।

सो घटनामा ती नेपाली संलग्न नभई एक भारतीय नागरिक सन्तोष सिंह संलग्न रहेको अदालतमा पुष्टि भएको अधिवक्ता खारेनले जानकारी दिइन् ।

मलेसियामा हत्या अभियोग प्रमाणित भएमा मृत्युदण्डको सजाय हुन्छ ।