काठमाडौं – फिल्म ‘लभ स्टेशन’ टिमले करेन्ट लागेर दुवै हात गुमाएकी मोरङकी मेघा गुरुङलाई आर्थिक सहयोग गरेको छ । निर्माण टिमले भक्तपुरस्थित मेघाकै डेरामा पुगर नगद १ लाख रुपैयाँ सहयोग हस्तान्तरण गरेको हो ।

अभिनेता प्रदीप खड्कासहित नायिका जसिता गुरुङ, निर्माता गोविन्द शाहीले एकसाथ रकम हस्तान्तरण गरे ।

आर्थिक सहयोगको आवश्यकता परेको थाहा पाएपछि निर्माण टिमले मेघालाई सहयोग गरेको हो । सहयोग रकम पाएपछि मेघाले कलाकार आफूलाई भेट्न घरमै आउँदा खुशी लागेको बताइन् ।

उज्ज्वल घिमिरेले निर्देशन गरेको यो फिल्ममा प्रदीप र जसिताको जोडी छ । फिल्ममा रमेश बुढाथोकी, प्रकाश शाह, रेशु भट्टराई, विनोद कुमार पौड्याल, प्रिया रिजाल, सरु बिष्ट, रवी डंगोल, दिनेश काफ्ले, कालु राना लगायतका कलाकारले अभिनय गरेका छन् ।

काफिया फिल्मसको ब्यानरमा निर्माण भएको यो फिल्म चैत्र २२ गतेदेखि रिलिज हुँदैछ ।