मोरङ– प्रमुख प्रतिपक्षी दल नेपाली कांग्रेसका नेता डा. शेखर कोइरालाले सरकारको कार्यशैलीका कारण जनतामा वितृष्णा पैदा भएको जनाएका छन् ।  नेपाली कांग्रेस, तरुण विभाग मोरङले बिराटनगरमा आयोजना गरेको ‘तरुण युवासँग कांग्रेस’ विषयक कार्यक्रमलाई सम्बोधन गर्दै नेता डा कोइरालाले सरकारकै कारण संघीयता गुम्ने खतरामा रहेको बताएका हुन् ।

नेता डा कोइरालाले गुट र उपगुटमा विभाजित भएकै कारण कांग्रेस कमजोर भएको बताउँदै पार्टीलाई पुरानै अवस्थामा फर्काउन गुटगत राजनीति त्याग्नुपर्ने बताए । उनले पार्टीभित्र वैचारिक गुट हुनुपर्नेमा गिरोह हावी भएको हुँदा राम्रा र योग्य व्यक्तिले पार्टीमा उचित स्थान पाउन नसकेको जिकिर गरे ।

आफूलाई पदको कुनै लोभ नभएको बताउॅदै डा कोइरालाले कांग्रेसलाई एक ढिक्का बनाएर पुरानै अवस्थामा फर्काउन अब कुनै कसर बाँकी नराख्ने बताए ।

‘गाउँ र दुर–दराजमा पुगेर मैले पार्टी र लोकतन्त्रका लागी जीवन भर लडाई लडेका साथीहरुको अवस्था देखेको छु। यो तरिकाले पार्टी चल्न सक्दैन भन्ने निष्कर्षमा पुगेको छु । अब पनि हामी जिम्मेवार नभए कहिले हुने ?’ डा शेखर कोइरालाले भने ।

‘कुनै बेला बीपी, सुवर्णशमसेर, गणेशमान र किसुनजीका बिचमा चरम बैचारिक मत भिन्नता थियो। उहॉहरु आ–आफ्नो बिचारमा अडिग हुनुहुन्थ्यो तर कहिल्यै त्यस्ता मत भिन्नता कार्यकर्ता सामू आएनन् ।’, डा कोइरालाले भने, ‘अहिले हामी नेताहरुकै कारण पार्टी मात्रै होइन कार्यकर्ताको मानसिकता पनि बिभाजित बन्न पुगेका छौं ।’

कार्यक्रममा कांग्रेस केन्द्रीय सदस्य डिला संग्रौला, मोरङ कांग्रेसका सभापति डिगबहादुर लिम्बु, राष्ट्रिय सभा सदस्य रमेशजंग रायमाझी, प्रदेस सभा सदस्य केदार कार्की लगायतले कांग्रेसलाई बलियो बनाउने जिम्मा तरुण युवाहरुको काधमा रहेको बताएका थिए ।