काठमाडौं- ललित स्मृति कप यू–१८ च्याम्पियनसिप फुटबलको उपाधि भिडन्त आज (आइतबार) हुँदैछ । उपाधी भिडन्तका लागि नेपाल पुलिस क्लब र ब्रिगेड ब्वाइज क्लबबीच कडा प्रतिस्पर्धा हुनेछ ।

फाइनल खेल दिउँसो ३ बजेदेखि ललितपुरको सातदोबाटोस्थित एन्फा कम्प्लेक्समा हुनेछ । प्रतियोगितामा ब्रिगेड ब्वाइज साबिकको विजेता हो भने पुलिस पहिलो पटक फाइनल प्रवेश गरेको हो । दुवै टोली जीतको लक्ष्यसहित मैदान प्रवेश गर्नेछन् ।

‘ए’ डिभिजन लिग खेलको ९ खेलाडीसहित एन्फा एकेडेमीका खेलाडीको बाहुल्यता रहेको ब्रिगेड प्रतियोगिताको एक मात्रै अपराजित टिम हो ।

समूह चरणको अन्तिम खेलमा पनि ब्रिगेडले पुलिसलाई ३–० गोल अन्तरले पराजित गरेको थियो । तर, पुलिसले सेमिफाइनलमा जावलाखेल युथ क्लबलाई ३–१ गोल अन्तरले हराएर फाइनल पुगेको थियो ।

ब्रिगेडले भने सेमिफाइनलमा मनाङ मर्स्याङ्दी क्लबलाई ७–१ गोल अन्तरले पराजित गरेको थियो । मनाङमाथि फराकिलो जित निकालेको कारण ब्रिगेड फाइनलमा ढुक्क छ ।

‘पुलिस पनि बलियो टिम हो । हामीले सामान्य सोचेर खेल्दैनौं । हामी जित्नकै लागि खेल्छौं ,’ ब्रिगेडमा मुख्य प्रशिक्षक सनोज श्रेष्ठले भने ।

एन्फाका पुर्व उपाध्यक्ष ललितकृष्ण श्रेष्ठको स्मृतिमा अखिल नेपाल फुटबल संघ एन्फाले आयोजना गर्ने प्रतियोगिताको विजेताले ३ लाख रुपैयाँ प्राप्त गर्नेछ । उपविजेताले १ लाख ५० हजार रुपैयाँ पाउनेछ ।