काठमाडौं- नेपाल प्रहरीको केन्द्रीय अनुसन्धान ब्यूरोले विभिन्न कार्डको प्रयोग गरी अनाधिकृत रुपमा एटीएमबाट रकम निकालेको आरोपमा एक जनालाई पक्राउ गरेको छ ।

ब्यूरोको टोलीले ‘फ्रड प्लाष्टिक म्यागनेटिक कार्ड’ को प्रयोग गरी राष्ट्रिय वाणिज्य बैंकका विभिन्न एटीएमबाट २० लाख रुपैयाँभन्दा बढी निकाल्ने बाराका ३३ वर्षीय राजुकुमार पाण्डेलाई शुक्रबार सार्वजनिक गरेको हो । व्यूरोको टोलीले उनलाई बिहीबार पक्राउ गरिएको जनाएको छ ।

ब्यूरोका प्रवक्ता, प्रहरी उपरीक्षक दीपक रेग्मीले विभिन्न कार्डको प्रयोग गरेर गैरकानुनी रुपमा रकम निकालेको सूचनाका आधारमा पाण्डेलाई पक्राउ गरिएको जानकारी दिए । पाण्डेले विदेशी नागरिकसँग मिलेर उक्त पेशा गर्दै आएको र विदेशी नागरिक अहिले नेपाल बाहिर रहेको अनुसन्धानमा खुलेको प्रहरीको भनाइ छ ।

पाण्डेलाई उच्च अदालत पाटनबाट सात दिनको म्याद थप गरी अनुसन्धान अघि बढाइएको प्रवक्ता रेग्मीले बताए ।