काठमाडौं– प्रहरीसँग भएको भनिएको दोहोरो मुठभेडका क्रममा नेत्रबिक्रम चन्द (विप्लव) नेतृत्वको नेकपाका सर्लाही जिल्ला इञ्चार्ज मारिएको घटनाप्रति राष्ट्रिय मानव अधिकार आयोगले अनुसन्धान शुरु गरेको छ ।

बिहीबार प्रहरीको गोली लागेर विप्लव समूहको सप्तरी जिल्ला इञ्चार्ज कुमार पौडेलको मृत्यु भएको थियो ।

प्रहरीका अनुसार हतियारसहित मोटरसाइकलमा रहेका विप्लव समूहका कार्यकर्तालाई नियन्त्रणमा लिन खोज्दा दोहोरो मुठभेड भएको थियो । जवाफी फायरिङका क्रममा गोली लागेर पौडेलको मृत्यु भएको प्रहरीको भनाइ छ ।

राष्ट्रिय मानव अधिकार आयोगले भने घटनाप्रति आफ्नो ध्यानाकर्षण भएको भन्दै सत्यतथ्य पत्ता लगाउन अनुसन्धान शुरु गरिएको जनाएको छ ।

घटनाको सत्य तथ्य छानबिन तथा अनुगमन गर्न आयोगको केन्द्रीय कार्यालय र प्रदेश नम्बर २ को कार्यालयबाट टोली खटिएको आयोगका केन्द्रीय प्रवक्ता वेद भट्टराईले जनाएका छन् ।

पवक्ता पौडेलका अनुसार उक्त टोलीले घटनाको अनुसन्धान तथा अनुगमन गरी तत्कालै आयोगमा प्रतिवेदन पेश गर्नेछ ।