जुम्ला– जुम्लामा ६ हजार भेडा–बाख्रालाई खोप लगाइएको छ । भेडाबाख्रालाई पीपीआर रोग (भाइरल डिजिज)विरुद्धको निःशुल्क खोप लगाइएको हो ।

जिल्लाको चन्दननाथ नगरपालिका क्षेत्रभित्र पर्ने पशुसेवा केन्द्र तलिउममा ३ हजार १ सय ९० र चन्दननाथ नगरपालिका जुम्ला शाखामा २ हजार ८ सय भेडा–बाख्रालाई खोप लगाइएको पशुसेवा केन्द्र तलिउमका प्राविधिक धनवहादुर बानियाँँले जानकारी दिए ।

चन्दननाथ नगरपालिकाको आयोजनामा मङ्गलबार लगाउन शुरु गरिएको खोप अभियान बिहीबार सकिएको हो । पीपीआर रोगका कारणले भेडा–बाख्रा नमरुन् भनेर वर्षेनी खोप कार्यक्रम सञ्चालन गरिँदै आइरहेको चन्दननाथ पशु शाखाका प्रमुख ज्ञानेन्द्रसिंह बुढ्थापाले बताए ।

किसानले आफ्ना भेडा–बाख्रालाई समयमै खोप लगाउने क्रम बढेसँगै पीपीआर रोगको संक्रमण घट्दै गएको पनि बुढ्थापाले बताए ।

एक वर्ष खोप लगाइएका भेंडाबाख्रालाई पछि दुई वर्षसम्म खोप लगाउनु नपर्ने उनको भनाइ छ ।

भेडा–बाख्रामा रोगको सङ्क्रमण हुनेबित्तिकै पशु स्वास्थ्य चिकित्सकसँग परामर्श लिन आग्रह गरिएको छ ।