बारा । त्रिभुवन आर्मी क्लबका डिफेन्डर दीपक गुरुङ सम्मानित भएका छन् । रुस्लान सिमरा गोल्ड कपमा आर्मीले विभागिय टोलीलाई ४–२ ले हराउँदा दीपकले पनि एक गोल गरेका थिए ।

आर्मीको जितमा टंक बस्नेतले २ तथा सुदिल राईले पनि १ गोल गरे । खेलमा दीपक म्यान अफ द म्याच घोषित भए । आर्मीका लागि एपीएफविरुद्ध खेलेसँगै दीपकले एउटा कीर्तिमान पनि बनाए । सिमरा गोल्ड कपको दशौं संस्करणसम्म आइपुग्दा सबै संस्करण खेल्ने उनी पहिलो खेलाडी पनि बने ।

सबै संस्करण खेल्ने एक्लो खेलाडी भन्दै सिमरा गोल्डकपको आयोजक नवजनजागृति क्लबले उनलाई आइतबार सम्मान गरेको हो । सम्मानसहित उनलाई क्लबले १० हजार रुपैयाँ प्रदान गर्यो । उनलाई क्लबका उपाध्यक्ष शंकर थापा सहितका पदाधिकारीले सम्मान गरेका थिए ।