काठमाडौं– पाँचथरको मिक्लाजुङ गाउँपालिका–३ मा २ परिवारका ९ जनाको विभत्स हत्या भएको घटनाबारे गृहमन्त्री रामबहादुर थापा (बादल)को जवाफ माग गरिएको छ ।

मंगलबार प्रतिनिधिसभा बैठकको शुन्य समयमा बोल्दै सांसदले घटनाको सत्यतथ्य छानबिन गरी दोषीलाई कडा कारबाही गर्न समेत माग गरे ।

नेपाली कांग्रेसकी सांसद पुष्पा भुसालले सो घटनाको सत्यतथ्य सार्वजनिक गर्न सरकारको ध्यानकर्षण गराइन् ।

घटनामा बाँच्न सफल भएकी बालिकाको उचित उपचारको प्रबन्ध गर्न पनि भुसालले आग्रह गरिन् ।

नेपाली कांग्रेसकै अर्का सांसद देवेन्द्रराज कँडेलले घटनाबारे गृहमन्त्रीको जवाफ माग गरे ।

२ परिवारका ९ जना व्यक्तिको विभत्स हत्या भएको घटना गम्भीर विषय भएको उल्लेख गर्दै सांसद कँडेलले यस विषयमा गृहमन्त्रीले संसदलाई जानकारी दिनुपर्ने बताए ।