काठमाडौं–पाँचथरको मिग्लाजुङ गाउँपालिका ३ आरुबोटेमा विभत्स हत्यामा ९ जनाको मृत्यु भएको छ । अहिले घटनास्थलमा जिल्ला प्रहरी कार्यालय, इलाका प्रहरी कार्यालयको टोली तथा स्थानीय जनप्रतिनिधि पुगेका छन् ।

घटनास्थलमा पुगेका मिक्लाजुङ गाउँपालिका वडा नम्बर ३ का वडाअध्यक्ष हस्तराज फियाकले घटनाको बारेमा जानकारी दिँदै एकान्तमा रहेका दुई घरका ९ जनाको हत्या भएको बताए ।

खबरहबसँगको कुराकानीमा उनले घटनास्थल नजिकै मृतक बमबहादुर फियाकका कान्छा ज्वाई पनि झुण्डिएको अवस्थामा फेला परेका छन् । बमबहादुर फियाक र उनका जेठा ज्वाई धनराज शेर्माको घरमा विभत्स हत्यको घटना भएको थियो ।

‘हामीले बिहानमात्र घटनाबारे जानकारी पायौं । सूचना पाउने वित्तिकै घटनास्थलमा पुग्दा यहाँको स्थिति भयाभह थियो । हामीले सबैतिर खबर गरेपछि अहिले प्रहरी, स्थानीयबासी तथा सम्पूर्ण जनप्रतिनिधिहरु यहाँ भेला भएका छौं,’ वडाध्यक्ष हस्तराजले भने, ‘काठमाडौंबाट सीआईबीको टोली पनि आउँदै गरेको हामीलाई जानकारी आएको छ । त्यो टोली आएपछि मात्र मुचुल्का उठाउने र पोस्टमार्टमका लागि लैजाने कुरा भएको छ ।

स्थानीय छिमेकीहरुले बताए अनुसार कान्छा ज्वाईसँगको पारिवारिक बेमेलका कारण यो घटना घटेको हुनसक्ने अनुमान रहेको उनले बताए । हस्तराजले भने, ‘कान्छा ज्वाई र छोरी बेग्लाबेग्लै बस्ने गरेको रहेछन् । अहिले घटनाको नजिकै कान्छा ज्वाईको शव पनि झुण्डिएको अवस्थामा फेला परेको छ । यसले घटना थप रहस्यमय बनाएको छ । बोल्न सक्ने अवस्था छैन ।’

उनले घटनाको विभत्स दृश्य देखेकी १२ वर्षकी बालिकासँग पनि पूर्ण रुपमा जानकारी लिन सक्ने अवस्था नरहेको बताए । घटना भएका दुई घर १५ मिनेटको दूरीमा रहेको पनि वडाध्यक्ष हस्तराजले बताए ।

३६ वर्षीया जस्मिता फियाक, ४१ वर्षीय धनराज शेर्मा, २६ वर्षीया मनकुमारी फियाक, छ वर्षीया इक्सा शेर्मा, १३ वर्षीया योवना शेर्मा, आठ वर्षीया मुना शेर्मा, ७४ वर्षीय बमबहादुर फियाक, नाम प्राप्त नभएकी बमबहादुरकी श्रीमती र १२ वर्षीया आशिका खजुम लिम्बूको विभत्स हत्या भएको हो ।

१२ वर्षीया सीता खजुम भने भागेर बाँच्न सफल भएकी छन् । उनी गम्भीर घाइते छिन् । मध्यरात भएको घटना स्थानीयवासीले बिहान मात्रै थाहा पाएका थिए ।