काठमाडौं– काठमाडौं महानगरपालिकाको नगर प्रहरीले शहरका विभिन्न स्थानमा अव्यवस्थित तरिकाले पार्किङ गरिएका ९ हजार ७ सय २५ मोटरसाइकल तथा स्कुटरका चालकलाई कारबाही गरेको छ ।

महानगरीय ट्राफिक प्रहरी महाशाखासँगको सहकार्यमा काठमाडौँको पुतलीसडक, दरबारमार्ग, लाजिम्पाट, बानेश्वर, कोटेश्वर, कलङ्कीलगायतका फुटपाथ क्षेत्रमा अवैध रुपमा पार्किङ गर्ने मोटरसाइकल तथा स्कुटरलाई नियन्त्रणमा लिएर कारबाही गरिएको नगर प्रहरीले जनाएको छ ।

नगर प्रहरी महाशाखा बग्गीखानाका प्रहरी नायब निरीक्षक श्यामप्रसाद तिमल्सेना ‘नो पार्किङ’ र फुटपाथमा पार्किङ गरेको मोटरसाइकल तथा स्कुटरलाई कारबाही गरिएको बताए ।

‘दैनिक ५० देखि ८० मोटरसाइकल तथा स्कुटर कारवाही गर्दै आएका छौँ,’ उनले भने ।

‘नो पार्किङ एरिया’ तथा फूटपाठमा पार्किङ गर्ने मोटरसाइकल तथा स्कुटरलाई कागजपत्र हेरेर १ हजार जरिवना गर्दै आएको नगर प्रहरीले जनाएको छ ।

नगर प्रहरीले चालू आर्थिक वर्षको वैशाख मसान्तसम्म मोटरसाइकल तथा स्कुटरलाई कारबाही गरेर ९७ लाख २५ हजार राजश्व संकलन गरेको जनाएको छ ।

नगर प्रहरीले जथाभावी पार्किङ गर्ने मोटरसाइकल तथा स्कुटरलाई नियन्त्रणका लागि १५ जना नगर प्रहरी खटाएको छ भने उनीहरुलाई ट्राफिक प्रहरीले सहयोग गर्दै आएको छ ।

महानगरीय ट्राफिक प्रहरी महाशाखाले भने मोटरसाइकल तथा स्कुटरलाई मादक पदार्थ सेवन (मापसे), लेन अनुशासन कारवाही, हर्न कारवाही, सिसी क्यामरा कारवाही, हेल्मेट नलगाउनेलाई कारवाही गर्दै आएको छ ।

यातायात व्यवस्था विभागका अनुसार २०७५ फागुनसम्म काठमाडौँ उपत्यकामा ९ लाख २१ हजार ९१७ मोटरसाइकल तथा स्कुटर सञ्चालनमा रहेका छन् ।