भद्रपुर– पूर्वी नेपालको पशुपतिनाथका रुपमा परिचित झापाको अर्जुनधारा जलेश्वरधाममा तीर्थयात्री र भक्तजनको घुइँचो लाग्न थालेको छ । झापासहित छिमेकी जिल्ला र भारतबाट समेत  जलेश्वरधाममा तीर्थयात्रीहरु पुग्ने गर्छन् ।

बढ्दो तीर्थयात्रीको संख्या र दीनदु:खीका लागि भन्दै धाममा नि:शुल्क भोजनको व्यवस्था समेत गरिएको छ ।  धामद्वारा स्थापित अन्नदान अक्षयकोषबाट जलेश्वरधामले रात्रिकालीन भोजन शुरु गरेको धाम समितिका कोषाध्यक्ष मोहन जोशीले बताए ।

अर्जुनधारा नगरपालिकाभित्रका असहाय र गरीबले समेत निःशुल्क सो भोजन ग्रहण गर्न पाउने व्यवस्था गरेको जोशीले बताए । ‘हाम्रो उद्देश्य भनेको नगरका कोही पनि भोकै नसुतुन् भन्ने हो,’ कोषाध्यक्ष जोशीले भने, ‘सँगै मन्दिरमा आउने भक्तजन र अतिथिका लागि समेत भोजनको व्यवस्था गरेका छौँ ।’

हालसम्म दाताको सहयोगबाट अक्षयकोषको रकम ३५ लाख बढी संकलन भइसकेको उनले जानकारी दिए । भविष्यमा १ करोडको अक्षयकोष बनाउने धामको लक्ष्य रहेको छ ।